षोडशमातृका आवाहन-स्थापन

 

 षोडशमातृका आवाहन-स्थापन 

ॐ आयंगौः पृश्निरक्रमी दस दन्मातरम्पुरः | पितरञ्च प्रयन्त्स्वः ||

 

0. ॐ गणपतये नमः, गणपतिमावाहयामि, स्थापयामि |

1. ॐ गौर्यै नमः, गौरीमावाहयामि, स्थापयामि |

2. ॐ पद्मायै नमः, पद्मामावाहयामि, स्थापयामि |

3. ॐ शच्यै नमः, शचीमावाहयामि, स्थापयामि | 

4. ॐ मेधायै नमः, मेधामावाहयामि, स्थापयामि |

5. ॐ सावित्र्यै नमः, सावित्रीमावाहयामि, स्थापयामि |

6. ॐ विजयायै नमः, विजयामावाहयामि, स्थापयामि | 

7. ॐ जयायै नमः, जयामावाहयामि, स्थापयामि | 

8. ॐ देवसेनायै नमः, देवसेनामावाहयामि, स्थापयामि | 

9. ॐ स्वधायै नमः, स्वधामावाहयामि, स्थापयामि | 

10. ॐ स्वाहायै नमः, स्वाहामावाहयामि, स्थापयामि | 

11. ॐ मातृभ्यो नमः, मातृः आवाहयामि, स्थापयामि |

12. ॐ लोकमातृभ्यो नमः, लोकमातृः आवाहयामि, स्थापयामि |

13. ॐ धृत्यै नमः, धृतिमावाहयामि, स्थापयामि |

14. ॐ पुष्टयै नमः, पुष्टिमावाहयामि, स्थापयामि |

15. ॐ तुष्टयै नमः, तुष्टिमावाहयामि, स्थापयामि |

16. ॐ आत्मनः कुलदेवतायै नमः, आत्मनः कुलदेवतामावाहयामि, स्थापयामि |

 

ॐ मनो जूतिर्जुषतामाज्ज्यस्य बृहस्पतिर्यज्ञमिमं तनोत्वरिष्ठं यज्ञ गुं समिमं दधातु | विश्वे देवा सऽइह मादयन्तामों३ प्रतिष्ठ ||

 

ॐ गणेशसहित गौर्यादि षोडशमातृकाभ्यो नमः |

एतानि पाद्यार्घ्याचमनीयस्नानीयपुनराचमनीयानि समर्पयामि ||

 

दुग्धस्नान -

ॐ कामधेनु समुद् भूतं सर्वेषां जीवनं परम् |

पावनं यज्ञहेतुश्च पयः स्नानार्थमर्पितम् ||

पयः स्नानं समर्पयामि |

 

दधिस्नान -

ॐ पयसस्तु समुद्भूतं मधुराम्लं शशिप्रभम् |

दध्यानीतं मया देव स्नानार्थं प्रतिगृह्यताम् ||

दधिस्नानं समर्पयामि |

 

घृतस्नान -

 

ॐ नवनीत समुत्पन्नं सर्व संतोष कारकम् |

घृतं तुभ्यं प्रदास्यामि स्नानार्थं प्रतिगृह्यताम् ||

घृतस्नानं समर्पयामि |

 

मधुस्नान -

ॐ पुष्परेणु समुद्भूतं सुस्वादु मधुरं मधु |

तेजःपुष्टिकरं दिव्यं स्नानार्थं प्रतिगृह्यताम् ||

मधुस्नानं समर्पयामि |

 

शर्करास्नान -

ॐ इक्षुरस  समुद्भूतां शर्करां पुष्टिदां शुभाम् |

मलापहारिकां दिव्यां स्नानार्थं प्रतिगृह्यताम् ||

शर्करास्नानं समर्पयामि |

 

पञ्चामृतस्नान -

ॐ पञ्चामृतं मयानीतं पयो दधि घृतं मधु |

शर्करा च समायुक्तं स्नानार्थं प्रतिगृह्यताम् ||

पञ्चामृतस्नानं समर्पयामि |

 

शुद्धोदकस्नान -

ॐ गंगे च यमुने चैव गोदावरी सरस्वती |

नर्मदा सिंधु कावेरी स्नानार्थं प्रतिगृह्यताम् ||

शुद्धोदकस्नानं समर्पयामि |   

 

वस्त्र -

ॐ शीतवातोष्ण संत्राणं लज्जाया रक्षणं परम् |

देहालंकरणं वस्त्र मतः शान्तिं प्रयच्छ मे ||

वस्त्रं समर्पयामि |

 

उपवस्त्र -

ॐ यस्याभावेन शास्त्रोक्तं कर्म किञ्चिन्न सिध्यति |

उपवस्त्रं प्रयच्छामि सर्वकर्मोप कारकम् ||

उपवस्त्रं समर्पयामि |

 

चन्दन -

ॐ श्रीखण्डं चन्दनं दिव्यं गन्धाढयं सुमनोहरम् |

विलेपनं सुरश्रेष्ठ चन्दनं प्रतिगृह्यताम् ||

चन्दनानुलेपनं समर्पयामि |

 

अक्षत -

ॐ अक्षताश्च सुरश्रेष्ठ कुंकुमाक्ताः सुशोभिताः |

मया निवेदिता भक्त्या गृहाण परमेश्वर ||

अक्षतान् समर्पयामि |

 

पुष्प -

ॐ माल्यादीनि सुगन्धीनि मालत्यादीनि वै प्रभो |

मया हृतानि पुष्पाणि पूजार्थं प्रतिगृह्यताम् ||

पुष्पं समर्पयामि |

 

दूर्वा -

ॐ दूर्वाङ्कुरान् सुहरितान् अमृतान् मंगलप्रदान् |

आनीतांस्तव पूजार्थं गृहाण गणनायक ||

दूर्वाङ्कुरान् समर्पयामि |

 

सिन्दूर -

ॐ सिन्दूरं शोभनं रक्तं सौभाग्यं सुखवर्धनम् |

शुभदं कामदं चैव सिन्दूरं प्रतिगृह्यताम् ||

सिन्दूरं समर्पयामि |

 

अबीर-गुलाल -

ॐ अबीरं च गुलालं च हरिद्रादि समन्वितम् |

नाना परिमलं द्रव्यं गृहाण परमेश्वरी ||

नानापरिमलद्रव्याणि समर्पयामि |

 

सुगन्धितद्रव्य -

ॐ दिव्यगंध समायुक्तं महापरिमलाद्भुतम् |

गंधद्रव्यमिदं भक्त्या दत्तं वै परिगृह्यताम् ||

सुगन्धितद्रव्यं समर्पयामि |

 

धूप -

ॐ वनस्पति रसोद्भूतो गन्धाढ्यो गंध उत्तमः |

आघ्रेय सर्वदेवानां धूपोऽयं प्रतिगृह्यताम् ||

  धूपमाघ्रापयामि |

 

दीप -

ॐ साज्यं च वर्तिसंयुक्तं वह्निना योजितं मया |

दीपं गृहाण देवेश त्रैलोक्य तिमिरापहम् ||

दीप दर्शयामि |

 

नैवेद्य -

ॐ शर्कराखण्ड खाद्यानि दधिक्षीर घृतानि च |

आहारं भक्ष्यभोज्यं च नैवेद्यं प्रतिगृह्यताम् ||

नैवेद्यं समर्पयामि |

 

आचमन -

ॐ शीतलं निर्मलं तोयं कर्पूरेण सुवासितम् |

आचम्यतां जलं ह्येतत् प्रसीद परमेश्वरि ||

आचमनीयं जलं समर्पयामि |

 

करोद्वार्तन -

ॐ चन्दनं मलयोद्भूतं कस्तूर्यादि समन्वितम् |

करोद्वर्तनकं देव गृहाण परमेश्वर ||

करोद्वर्तनकं चन्दनं समर्पयामि |

 

ताम्बूल-पूगीफल -

ॐ पूगीफलं महद्दिव्यं नागवल्ली दलैर्युतम् |

एलाचूर्णादि संयुक्तं ताम्बूलं प्रतिगृह्यताम् ||

ताम्बूलं समर्पयामि |

 

ऋतुफल -

ॐ इदं फलं मया देवी स्थापितं पुरतस्तव |

तेन मे सफलावाप्तिर्भवेज्जन्मनि जन्मनि ||

अखण्डऋतुफलं समर्पयामि |

 

दक्षिणा -

ॐ हिरण्य गर्भ गर्भस्थं हेमबीज विभावसोः |

अनन्त पुण्य फलद मतः शान्तिं प्रयच्छ मे ||

द्रव्यदक्षिणां समर्पयामि |

 

आरती -

ॐ कदली गर्भ संभूतं कर्पूरं तु प्रदीपितम् |

आरार्तिकमहं कुर्वे पश्य मे वरदो भव ||

आरार्तिकं समर्पयामि |

 

पुष्पाञ्जलि -

ॐ नाना सुगन्धि पुष्पाणि यथा कालोद्भवानि च |

पुष्पाञ्जलिर्मया दत्तो गृहाण परमेश्वर ||

पुष्पाञ्जलिं समर्पयामि |

 

प्रदक्षिणा -

ॐ यानि कानि च पापानि जन्मान्तर कृतानि च |

तानि सर्वाणि नश्यन्तु प्रदक्षिण पदे पदे ||

प्रदक्षिणां समर्पयामि |

 

इति षोडशोपचारैः सम्पूज्य प्रार्थयेत् -

ॐ गौरी पद्मा शची मेधा सावित्री विजया जया |

देवसेना स्वधा स्वाहा मातरो लोकमातरः ||

धृतिः पुष्टिस्तथा तुष्टिरात्मनः कुलदेवता |

गणेशेनाधिका ह्येता वृद्धौ पूज्याश्च षोडश ||

 

 

अनया पूजया सगणेशगौर्यादि कुलदेवतान्त षोडशमातरः प्रीयन्तां न मम |